April 2006

01 02 03 04 05 06 07 08 09 10 11 12 13 14 15 16 17 18 19 20 21 22 23 24 25 26 27 28 29 30

火警驚嚇

Apr 30, 2006 (Sun)

今日我又再嚇親，係咪我太細膽呢?(我覺得自己都幾膽小架~_~)。今晚當我係廚房正想準備晚飯既時候，特然聽到警報器響。當時我以為自己唔知道整到咩，所以響，攪到我好驚唔知道點算 。但當我走出門口看看既時候，見到一個人都無，但走廊又所有防煙門都關上(平時係打開架，可能警報器響會自動關上)，所以我意識到係火警鍾響，於是我好驚青地走樓梯逃生。走既時候都幾驚，可能心理作用覺得有D怪味/燶味，個心立刻脅一脅，(當時候我褲袋有key和電話)好彩係樓梯碰到其他女仔 ，於是我地就一齊走出building外面等候。

好快消防員就趕到，他們檢查左十幾廿分鐘就走。我都唔知道點解個火警鐘響，不過肯定唔關我事囉，我都未開始煮飯 。我估都係誤鳴啦。唔見消防員救火。

今日落雨天氣特然凍返啊，
好彩我有車匙可以上車避一避，
我又無外套，我都挨左一陣凍先上車。

我係車既時候從天窗用電話影架消防車。
點知裡面既消防員笑笑口同我say hi。
相中都見到他隻手。哈哈..我唯有怕醜地以笑回報:P



超市驚嚇

Apr 29, 2006 (Sat)

今早凌晨四時半，我出發去朋友家，然後車他到機場。接他之前我都無訓教，因為我忙著自己的事情。送完他後我回家才呼呼入睡，直到11時:D。

之後一直忙著，直到晚餐後才有時間去超級市場。我好開心地買啊買啊，完全忘記超級市場的關門時間。特然間，超市的燈較暗了一半。哇~!我當時候好驚好慌張>_<，又聽見另一個女顧客叫(我好細膽^^)，唯有立刻去Cashier比錢 ，好彩當時仲未關門^^。等候既時候，才見一個大肚西人斯斯然甘去比錢。點解其她可以甘冷靜既?:(。我覺得較暗燈比起廣播更有效，通常D人都立刻去比錢，但就會嚇親顧客囉，我情願廣播。因為特然要走，所以我其實未買完。我仲未行Oriental section架，唯有聽日再去:D


"Special K" Cereal係因為看了廣告才買(個廣告都好深刻)。
呢個係新出既Vanilla Almond，應該幾好食^^。
另外個盒"So Good"唔係雪糕 ，係用黃豆整，
但口感好似雪糕，又係low fat架。我真健康:D





美味Pasta

Apr 28, 2006 (Fri)

今晚晚餐去了食Pizza Hut，我最近上了Pizza Hut毒癮^^?不過今次唔係外賣，而係堂食。其實我比較喜歡外賣，因為可以係屋企舒舒服服甘食。但缺點係外賣無pasta叫架 ，所以今次堂食當然要叫pasta一嘗心願啦。


今晚點了一個buffalo wings做appetizer和兩個pastas

我比較喜歡白汁個個pasta^^，食既時候我好留心材料和味道，我打算遲D自己試下整^^。另外個碟係Meat Lasagna，都好好味，不過漏左D。Lasagna既肉係牛肉 ，但今次食後就無皮膚敏感。早前我翻看舊日記，發現我記低左醫生同我講話生牛肉會比熟牛肉更容易令我敏感，上次我自己煎牛扒，我只煎到五成熟，唔怪得上次敏感得甘嚴重啦 。嘿~!好開心發現我唔係次次食牛肉都敏感^^。




日本料理

Apr 27, 2006 (Thu)

今日又累又餓，所以晚飯都係出外開餐，食餐飽!^^因為已經餓到手軟腳軟，所以去到餐廳就叫了一個二人套餐同朋友一齊食，套餐快啊麻!


nihon no tabemono wa oishii desu~!
(Japanese food is delicious)

食野既時候我依然係餓到震，要食到一半先好返D。呢個套餐份量都幾多，食到尾已經好飽，要夾硬食先食得晒~!好飽^^今日我一時過餓，一時過飽，哈哈，好傷身:D。

今日當老闆娘問D野好唔好食既時候，我用日文同她講"oishii"哈，她表現得好開心^^。我學過幾年日文，終於第一次同日本人講日文。雖然我學過幾年日文 ，但又放低左日文幾年，所以好多都唔記得晒，比返晒老師:(。將來有機會一定要再學^^




Happy的新相

Apr 26, 2006 (Wed)


剃毛後的Happy都可愛啊^^

最近哥哥心情大好，居然主動sent了Happy仔剃毛後的相比我看(剃剩個頭和尾巴)。Happy的毛果然不太醜樣，而且Happy看上去瘦左添。不過當我見到Happy皮膚有問題的位置時 ，我覺得好肉赤(好赤好赤~_~)。希望Happy仔快D好返啦。媽咪話Happy既毛長得好快，一個星期已經長返三份一寸。^^我都好想摸下^^。

今天我的心情已經好返一點。我總係情緒化。.^^




家常便飯

Apr 25, 2006 (Tue)

最近好少真真正正的煮一餐家常便飯，所以今日雖然忙於溫習，但都花少許時間煮兩個小菜。今晚煮了豉油雞翼+西蘭花炒莤芹。好耐無食過飯，所以都好開胃，不過因為煮得太多 ，所以最後都食唔晒。


簡簡單單的一餐 ，已經好滿足^^

今日心情不太好，而且都幾失暈，煮飯既時候我少有地打欄左個煲蓋(印象中好似未打欄過碗碟)，仲正傷左手指少少添:(。今天知道Hubby要五月十八日才考完試。唉!有D唔開心 。可能人總係貪心啦，喜歡男友努力上進，但另一方面又想男友多點時間陪自己。我發覺自己都幾雙重標準!~_~




換歌

Apr 24, 2006 (Mon)

因為我播放器首"out of the blue"不見了，所以今天忙裡偷閑更換了一首因為Hubby而愛上既一首歌"sometimes when we touch"。 這是一首很舊很舊既歌 ，不過都希望大家一同欣賞。

除了個Melody外，我都很喜歡呢首歌詞。愛就好似呢首歌詞一樣慢慢develop，慢慢昇華。係search呢首英文歌詞既同時，發現了溫拿唱過呢首歌既中文版 。雖然我喜歡英文版多D，但中文歌詞都好似幾好。有一句更出現在昨晚的夢裡。

柔情難寄不必悽愴
茫茫情海你莫徬徨
情緣如難付托
為何情深一往
何必惋惜悲傷
何必苦楚悽愴
何用落淚惆悵
看滿眼春花正香

溫馨的愛情 願你絲絲心內藏
情重好比天地長山川壯
愛意殷不管風雨狂
 未畏崎嶇山路長
愛會再重到愛歌早晚細唱
(愛滿佈塵世與星月同光)

似冬青不怕風霜兩心好比秋月朗
我盼你會有真愛
愛的花永芬芳

昨晚發夢就是夢見我同Hubby係山路上一直行一直行，行了很久未到達目的地，不過我一點畏懼都無。



食物敏感

Apr 22, 2006 (Sat)

昨晚係床上翻來覆去都係訓唔著，原因係我又再身痕(唔係想打啊:P)。昨晚食了牛肉，所以又再一次證實我真的對"牛肉敏感"!食了粒Piriton後超級眼訓~_~"。眼皮不受控制地下降 ，食完呢隻藥，都係買返之前醫生介紹個隻Reactant，起碼無眼訓呢個副作用。上堂忍眼訓好辛苦架!(可惜我有幾盒Piriton侟貨，有排食~_~)


今日見無咩胃口 ，所以煮了粟米雞肉麥皮!好味^^

最近無同Hubby在網上MSN，讓他可以專心考試。原來呢個方法好有效。(證明我的一舉一動多影響他~_~)。無MSN後Hubby既考試都科科A，仲有兩個exams囉100%添(好叻啊@_@)。少了聯絡都是值得的^^。現在我們雖然少了聯絡 ，但就進一步邁向了我們的將來^^。




唔舒服~_~

Apr 21, 2006 (Fri)


是日晚餐

今晚晚餐決定整西餐，所以就煎了牛扒，整了薯蓉，和salad，還有grapes做飯後果添。本來打算開個罐頭湯，甘成個晚餐就完整喇，不過眼闊肚窄費事食唔晒啦!

好耐無食牛，因為之前驗到我對牛肉敏感。今日食完後皮膚無痕。唔通我對牛肉已經唔再敏感?不過今晚我就唔多舒服，飯後覺得個心好似跳得好快，呼吸又好急。好似吸極都唔夠氧氣 ，好辛苦~_~。唔通今早個鬼婆咳既時候正面咳落我塊面到，所以轉染到我?

D人好無品，咳都唔蓋住個嘴>_<。我唔病得架，過兩日final喇:(。




剃毛後的Happy

Apr 20, 2006 (Thu)

雖然經過家庭會議後我們都贊成Happy仔要剃毛毛，但我媽咪始終很肉痛Happy仔要剃毛，所以一直未有帶Happy去剃毛。經過個多星期的考慮和觀察。眼見Happy已剃毛的地方已經有好轉 ，所以昨天媽咪便決定帶Happy去獸醫全身剃毛。


獸醫很細心地幫Happy全身剃毛，只剩低頭和尾巴。獸醫幫Happy順毛地剃，沒有返方向剃，所以Happy還剩下薄薄的毛，(塗到藥水就唔需要返方向剃)。Happy現在的毛好像"絲毛擁"般幼滑和很白淨 。令Happy看上去更年輕。真係估唔到原來剃毛後的Happy都幾靚:D

不過在獸醫clinic時，Happy見到檯上的毛就唔多開心和有D驚，護士給他零食都唔肯食。連我媽咪給他都唔食。要知道Happy一向十分貪吃，唔肯食野都係第一次:(。好彩Happy現在已經無咩野 。D毛薄左仲舒服添!




藍藍炒飯

Apr 19, 2006 (Wed)


藍藍炒飯

今日我既第一餐係晚餐，因為唔覺得餓，所以就等到晚餐先食喇。由於最近忙於溫習無去超級市場入貨，屋企既食物已經食晒。唯有有限既資源滿足我無限既需要啦。找來找去屋企得返雪藏老虎蝦 ，雞蛋，臘腸和少少莤芹，於是我就決定今晚整炒飯。因為呢個炒飯咩材料都落D，所以我就叫它為藍藍炒飯:D


雖然話屋企無晒食物，但搵搵下材料都幾豐富:D

我發覺原來用莤芹炒飯係好香架。(最近我愛上莤芹，煮餸，煲湯，salad，連整炒飯都想落莤芹:P)，另外我整炒飯最愛落疆和蔥，無左呢兩樣材料味道差好遠架。^^




近況

Apr 18, 2006 (Tue)

已經好幾日無update，因為最近要溫習麻，等我會報一下近況啦!

1)今日考了statistic，覺得都幾容易^^。呢科Stat應該係我undergrad生崖最後一個statistic course了，可悲可喜? 今日個exam仲有一題好容易既bonus，小學三年班都識，題目: What is the answer of five plus five divide by two? 就係甘，我個final grade就多左1%喇^^。

2)原本以為考試期間會肥，(因為溫習時候經常食野，飲diet coke)，不過體重繼續下跌，又輕多兩磅。可悲既係，外型上唔覺得有變:(。即係話要繼續減。

3)最近個email account唔知發生咩事 ，junk mail就去晒inbox，但一些朋友們既信就去左junk mail。我已經及時發現幾個朋友的mails。不過我就唔知道miss左幾多 。如果send左email俾我好耐但我都無回覆就請send多次啦。

4)Happy皮膚情況未有改善，因為我媽咪唔捨得Happy剃毛，(老狗剃毛後要3-4個月時間先會生返晒D毛)所以需要較長時間Happy才能康復 。現在Happy已經用香港配的藥水。


去年暑假臨去機場前和Happy影的 ，
我好掛住Happy啊!

嘿嘿~!報告完畢~!




食草

Apr 14, 2006 (Fri)

復活假期加上學期完結(等考試)，roommate就和她一大班朋友在家開party，看電影，傾計和玩card game。她一早就問我介唔介意，好nice既我，當然無問題 。As long as唔好太嘈就ok。我要溫習麻!

怕醜既我同她班friends say左hi，就一直留係自己房。晚餐我都唔好意思煮飯(我怕生保麻)，所以今晚我做左一隻羊，食草，費事留係廚房太耐(開放式廚房)。其實食草即係食spinach+我最愛既dressing就一餐 。大力水手最愛食spinach，食左會大力D，但點解我就食完都係無咩力:D??spinach本來幾好食，只不過食到我條俐好"鞋"囉。


spinach+我最愛既dressing



細膽

Apr 13, 2006 (Thu)

昨晚流鼻血，好驚啊，我甘大個女都係流過三四次。初時仲以為係流鼻水，見到係血有D唔知點算~_~。我唯有夾硬用紙巾按住，用口呼吸。好彩好快無事。唔知道係天氣乾，定係我熱氣呢?以前我啊哥流鼻血流得好勁 ，所以我對流鼻血都有d陰影。

今日幾個朋友一齊係屋企食Pizza Hut外賣。我負責去買，一個Pizza加多$9.99就多3樣野食。不過我拿著食物離開既時候發現還欠我一個salad啊 ，結果要返轉頭問。其實我有D驚他話已經給左我，以為我騙他，好彩，他都發現自己忘記給salad我，仲同我道歉。:)有時候我都幾細膽架!真無用!


今日我主要係食Caesar salad，又食了少少BBQ雞翼和少少Cinnaparts。我無食pizza啊。係咪好乖呢?:D




新公仔

Apr 12, 2006 (Wed)


呢隻狗狗係我今日新買的 ，可愛嗎?似邊個呢?:P

今日我又再車同學去拿褲，所以就順便去Mall既shiseido到買返支防曬。我用開那支差不多用完。係呢邊買shiseido防曬貴過係香港買$100HKD，好唔抵囉>_<，不過用開都要繼續買啦!

古老人既說話真有道理，"無事出街少破財"係真的。如果今日唔去開mall，我就唔會買隻新公仔(我幾多歲啊?~_~)，不過我真係十分十分喜歡呢隻新狗仔囉 。它生得好似我隻狗Happy啊。我見它又唔係貴，所以就買左它回家:D，我打算送它給Hubby.:D等他可以攬住狗狗當係攬住我:P

我返到屋企，就show隻公仔給roommate看，原來她都有玩公仔的(拿!唔好話我細路女..:PI am not the only one)。她對公仔(上圖右下角)係用真的動物毛做的 ，好滑架。她仲話係隻動物天然死左之後先連皮帶毛整的。有少少恐怖，不過D毛又真係幾滑架。


I wonder how old I am.
How come I still like to play with dolls so much?



較預期理想

Apr 10, 2006 (Mon)

減肥進度比預期好，我已經成功地減去5磅。究竟點解會減得甘快?真係一個謎。可能我食的少掛。我再減多五磅就夠喇，我都唔喜歡太瘦。:D


呢個幾日我都係食大量蔬菜+麥包。我用了番茄，茜芹，紅蘿蔔，青椒和洋蔥煲湯。一點鹽都不能加。食既時候就加一點黑胡椒。個湯雖然清，但都好甜好飽肚架。基本上呢幾日都無挨過餓 ，有時候真係想食野就食個蘋果。呢幾日需要補充返D鐵質:D。




肉痛x10000000....

Apr 10, 2006 (Mon)

今日收到一個好肉痛的消息，我個寶貝自從在大陸的寵物店美容後，皮膚出現脫毛，它的皮膚變得一達達。我真係好心痛啊>_<

我地肯定係寵物店唔乾淨囉，Happy係加拿大，和香港既時候都未試過甘。我媽咪就返左香港去我地相熟既pet shop幫Happy仔買藥水塗。之後就帶Happy去左看大陸獸醫 。去到醫院，已經見到有狗狗吊鹽水，那裡的動物醫院衛生情況當然不及香港和加拿大的動物醫院，不過都無辦法啦，都要看架。

獸醫問我媽有無幫Happy自行塗藥水，甘我媽就當然給藥水醫生看啦。最後醫生無開藥水，因為他們用的都是大陸藥，無進口的，他們的藥都不及我們自己買的。但醫生開了口服的藥給Happy，和建議Happy全身剃毛 。(我媽無比醫生即時幫Happy剃毛，今日媽咪同我相量過後才決定過兩日帶Happy返去醫生到剃毛 ，好慘~_~)獸醫最後收費$20RMB，下??我媽的反應以為自己聽錯。會唔會係$200蚊?Happy仔每次係香港看醫生，每次都近千元啦。係加拿大就更加貴 ，唉!Happy仔係大陸真慘，:(唔知道廣州有無外國人獸醫看呢?我都要問一問我來自廣州的同學先得喇。

我媽決定幫Happy既皮膚影相，然後帶去給香港獸醫看 ，然後配藥。唔知道大陸有無較好既獸醫呢?其實Happy現在身在中山，那裡的社區是無合法的狗牌，(即係話那裡的人是無牌養狗，我Happy當然有狗牌啦!)，但點解當地會有有牌獸醫呢?又是一個謎 。




朱古力蛋糕(二)

Apr 08, 2006 (Sat)


今日我又再整朱古力蛋糕 ，
呢個蛋糕靚D，定係上個月整個個靚D?

上次朋友說我的蛋糕好味道，所以今日我又再整。對我而言，減肥最慘不是要節食(不過都慘架)，而是無得整野食。好彩有一班朋友欣賞我的食物^^，幫我手食。

我真的很想買返set整蛋糕的器材(我連打蛋開麵粉都只能用叉 ，個焗盤就係roommate既)，不過一年後我都離開加拿大，所以就唔想浪費金錢購買啦，都唔帶得返香港。將來返香港，一定要買返set，等我可以繼續開開心心整蛋糕^^。(希望將來有時間啦)

將來返香港，我都好想去學整蛋糕，因為我有一些關於蛋糕既問題都未識得去解決，而且，蛋糕既裝飾和蛋糕其實不能blend together，我只會放裝飾在蛋糕面。



餐後檢討

Apr 07, 2006 (Fri)

減肥既大忌就係出街食飯，出街食飯要食得清淡都幾難，不過人總不能日日留係屋企食飯架麻。

今日朋友叫了我出去Tim Houston食晚餐(fast food restaurant)，本來都覺得有點違反我減肥的原則，但最後都去了 ，唯有聽日再努力過啦。


右上角既餐先係我既^^

今日我選了一個三文治餐:「生菜番茄火雞配麥包」+「turkey and wild rice soup」+「diet coke」一罐。我估成個餐，最肥都係個湯(飲完好guilty)。個三文治我只食了一半，應該唔肥掛。今日我特登選食麥包而非普通的白包，因為麥包fiber高D，容易排出體外，而白包其實好肥，它會變成糖份令身體吸收架 ，減肥既我當然揀麥包啦。最後看看diet coke罐上寫著只有2個卡路里加2% sodium，話明係diet，我都好放心飲:D。 (sodium好似係鹽，其實肥唔肥呢?我有點懷疑究竟diet coke其實會唔會肥囉)，以fast food黎講，呢餐都唔算過份啦!

其實我都幾喜歡食Tim Houston(近年好似越開越多)，呢個餐同McDonald's既餐價錢差不多，真係算抵食，而且亦比McDonald's健康 ，起碼都係"real food"麻。



色情留言

Apr 06, 2006 (Thu)

最近發現許多網友既留言版都有一些無聊的廣告，今次連我的留言版都有，更離譜的是，在我留言版上那些留言看上去是普通的留言，但原來留言者留下的網址居然是三級網址。(我都不肯定是三定四級喇 ，我一看到便即時關閉視窗。)今天早上醒來後發現有10個這樣的留言，之後再增加多兩個，數目甘多真係令我要時時刻刻都看著我的留言版 ，一旦發現那些留言便要立刻delete。

最令人煩惱的是所有色情留言都不同IP，(但IP類似)我要block都唔block得甘多。我更發現，那些留言者不是經過我網頁進入的，而是直接去留言版 。真係令人百思不得其解~_~。究竟我可以點做?呢D色情留言同email裡的junk mail一樣，令人好煩惱好討厭啊!

另外昨晚發了一個好恐怖好恐怖的夢，足以令我整日都心不在焉!驚驚!




我要減肥>_<

Apr 05, 2006 (Wed)

有看我日記都知道我最近經常下廚，今日終於出事了。今日我上磅一磅，嚇了自己一跳，我既體重已經亮起紅燈，攀到近年來的新高(救命啊!!)。炎炎夏日又就快來臨，我真係要進行極速減肥計畫先得喇 ，如果唔係我點著短裙小背心呢!

未成功減肥前，我唔會食朱古力，曲奇，蛋糕，可樂，和檸檬茶等。我要介掉所有零食!!真係唔介口唔得喇><。雖然Hubby話我唔肥過115磅就ok(我距離115磅好多好多窩!)，但我既體重已經過左自己set給自己既limit好多 。我唔想肥啊..:(。我既減肥目標都只不過係減返去原來體重，一點都唔貪心架。我要努力，我要恆心，我要成功啊~!

至於正餐，我都係餐餐食菜好喇(我會食飯，不過會唔會食wheat bread，湯米粉個D會瘦D呢?)...唔知道我忍唔忍到口呢..:(究竟係我生活習慣 ，遺傳，定係我生活開心導致我肥呢?今日全日只食左個麵包做午餐，有D肚餓啊:(


就連我家的Happy都係肥嘟嘟的 ，一定是遺傳啦..哈
Happy現在已經適應左大陸的新生活喇^^
(相片來自Web Cam，所以quality較差)





一歲喇

Apr 03, 2006 (Mon)

我和Hubby既學期已經進入最後階段，為了大家學業架著想，我們都覺得暫時唔用MSN，好讓大家可以好好溫習。Hubby努力啊~!我會默默地支持你架^^。我好期待學期完結 ，希望我們計畫可以實行啦^^。


Happy Birthday to Seal Seal (白色個隻)

今日係我大仔Seal Seal一歲生日啊。一年前既今日，Hubby帶了Seal Seal回家。轉眼間他已經一歲了。Seal Seal，Happy Birthday~!生日快樂 ，快高長大(我很白痴很幼稚嗎?..嘿嘿..:P)





螺絲粉

Apr 02, 2006 (Sun)


番茄莤芹蘑菇螺絲粉

最近心情好好，好有心情下廚啊。今晚晚餐我就煮番茄莤芹蘑菇螺絲粉。我最愛食普通既義大利粉啦，第二最愛就係螺絲粉，很受歡迎的angel hair我就麻麻喇。(其實味道差不多 ，只是口感唔同?)

因為屋企材料有限，所以呢個螺絲粉只係落左碎豬肉(我唔食牛麻)，莤芹和蘑菇。雖然簡簡單單，但味道都好ok架:P(自己讚自己添..:P)。我自己喜歡番茄味道多過白汁 ，覺得開胃D^^


制作過程





自創的salad

Apr 01, 2006 (Sat)


我自創的salad

最近自創了一款Salad。我覺得味道唔錯架，今次已經係第二次整喇。我呢個Salad係用一個叫"Russian"既 dressing。我好喜歡呢個dressing既味道 ，甜甜地，一d都唔酸^^。



呢個Salad材料好簡單有莤芹，番茄，蘋果，和生菜。第一次落莤芹整salad，效果好好，非常香。^^